الفازلين.. وما أدراك ما الفـازلـيـن

الــســلام عــلــيــكــم و رحــمــة الــلــه و بــركــاتــه

جيلي البترول أو المعروف باسم الفازلين هو منتج مستحضرات التجميل الأكثر استخداما في المنازل حول العالم ..

له استخدامات رهيبة، والتي يمكن أن تساعدك في الحياة يوما بعد يوم ..

*

*

الــوجــه

• للبشرة الجافة جداً، يمكن تدفئة شوي من الفازلين واستخدامه ككريم ليلي ..
• استخدامه كمزيل للمكياج، وفي نفس الوقت يرطب البشرة ..
• استخدميه مع الروج عشان تسوين بلشر كريمي لخدودك ..
• إذا حطيتي مكياج ممكن تحطين منه أعلى الخدين عشان يعطيك لوك دوي للبشرة (نضر) ..

***

الــعــيــون

• ليلاً حطي فازلين على أطراف أصابعك وامسحي على رموشك وعلى كامل جفونك وأسفل عينيك (ونوم العوافي 🙂 )، بهذي الطريقة رح تضربين عصفورين بحجر.. أولاً حماية العيون من التجاعيد المبكرة وترطيبها، وإطالة الرموش وتغذيتها (شخصياً لاحظت الفرق في رموشي) ..

• لإزالة مكياج العيون حطي على قطنة وامسحي الجفون واتركيها دقيقة تقريباً بعدين امسحي بقطنة نظيفة ..
• إذا كانت الرموش الصناعية ناشبة على عينك هههههههه حطي فازلين وبيتفكك الصمغ ..
• إذا كانت حواجبك كثيفة وتبغين تثبتينها في مكانها مشطيها بشوي فازلين ..
• إذا كنت تستخدمين شدو سائب حطي مسحة بسيطة بالفازلين ورح يثبت، وبيعطيك لمعة حلوة تحت الشدو ..

***

الــشــفــاة

• لشفاة ناعمة وطرية حطي فازلين على شفايفك ..
• تقدرين تحطين معه سكر وتسوين مقشر للشفايف ..
• تقدرين تخلطين معه شدو أو بلش بأي لون تبين وتسوين لك قلوس حلو ..
• أو تخلطين معه بودرة شوكولاتة ويصير عندك مرطب بالتشوكليت 🙂 ..
• إذا عندك مناسبة و بتبتسمين كثير، حطي طبقة على الأسنان عشان ما تلصق الشفايف عليها، وبرضو هذا الشيء بيمنع تبقع الأسنان بالروج (الفنانات وملكات الجمال يسوونها) ..

***

الــشــعــر

• قبل وضع صبغة الشعر أو كريم الفرد ضعي القليل من الفازلين على فروة الرأس عشان ما تسببلك المواد الكيميائية الموجودة فيها أي تهيج في الفروة ..
• إزالة العلك من الشعر ضعي الفازلين على الشعر وملسيه عليه حتى تنزلق العلكة ..
• لإخفاء تقصف الشعر (أطراف الشعر المنقسمة) حطي شوي على اصبعك وامسحي عليها ..
• لمنع دخول الشامبو في عين الطفل، امسحي الفازلين فوق الحواجب عشان ينحدر الماء من الجانبين ..

***

الــيــديــن

• لتنعيم اليدين حطي فازلين والبسي قفاز بالليلل قبل النوم، ممكن تسوين هذا الشيء مرة أو مرتين اسبوعياً ..
• دلكي أظافرك بالفازلين ليلاً لو كانت بسرعة تنكسر أو مقصفة فالفازلين يقويها ..
• لتليين الجلد الميت حول الأظافر ..
• إذا كان عندك صعوبة في فتح غطاء المناكير ضعي طبقة رقيقة من الفازلين على حافة الزجاجة ..
• إذا كان الخاتم عالق بإصبعك غطيه بالفازلين ثم اسحبي الخاتم ..

***

الــقــدمــيــن

• لأقدام ناعمة نقعيها في ماء وصابون لعشر دقائق ثم افركيها بالحجر أو بالصنفرة، ثم جففيها وامسحيها بالفازلين وإلبسي شراب ..

***

الــجــســم

• إستعملي قليلاً من الفازلين على كامل جسمك بعد الحمام لتحصلي على بشرة ناعمة لطيفة، اغسلي وجهك وبينما هو مبلول ادهنيه بكمية صغيرة من الفازلين واصلي دهن وجهك حتى يتشربه ولا يبدو وجهك دهنيا (تستمعل المنتجعات العلاجية هذا العلاج السري) ..
• لتهدئة تهيج البشرة بعد إزالة الشعر ..
• للمعتمرين أو الحجاج، وضعها بين الأفخاذ لمنع احتكاكهما خلال المشي، خاصة لذوي الأوزان الثقيلة ..
• لأكواع وركب ناعمة نضع الفازلين يومياً، فعاليته أفضل من الكريم أو اللوشن العادي ..
• ينفع لعمل المساج ..
• اخلطيه مع ملح البحر و اصنعي مقشر للجسم ..
• للوقاية من خشونة البشرة وجفافها في فترة الشتاء نحط الفازلين (خاصة على باطن الأقدام) ..
• يلطف البشرة المصابة بالأكزيما ..
• تقدرين تخلطين معه اللوشن أو الكريم المفضل عندك عشان تطول فعاليتها على البشرة أكثر ..

• لإطالة عمر العطر أو دهن العود، امسحي طبعة بسيطة جداً على المكان المراد رشه، ثم رشي العطر، بتقعد الريحة معك إلى الاسبوع الجاي ههههههههه ..
• إذا كان عندك صعوبة بإدخال الحلق بإذنك حطي عليه شوي و بيزلق معك ..
• إذا بغيتي تلمعين شنطتك أو الشوز (وانتوا بكرامة) امسحي شوي بمنديل ..

*

*

*

هذي بعض الإستخدامات الشخصية، هذا غير الأستخدامات في أنحاء المنزل ..

أتمنى يكون عجبكم الموضوع

ولا تنسون الإشتراك بالمدونة 🙂

طريقة ضفيرة ذيل السمكة

مــــــرحـــبــــا

من يوم كنت صغيرة وأنا أتمنى أتعلم طريقة جديلة ذيل السمكة، ولأن شكلها معقد كنت أتوقع أنها صعبة (أنا الضفيرة العادية ضبطتها وأنا بثاني متوسط… فشلة هههههههه)، كنت أطلب من أختي الكبيرة تسويها لي (كانت الكوافيرة حقتي 🙂 ) ..

ولأني عارفة أن فيه بنات كثير يبغون يتعلمون طريقتها، اليوم جبت لكم الخطوات مبسطة ومفصلة ..

مع التدريب بتصير عندك مثل الضفيرة العادية 🙂

و هــــــكــــــــــذااا

***

طبعاً لك الحرية بتنسيق شكل الضفيرة سواء مرفوعة، مشدودة، عالجنب.. أو عشان تعطينها لوك أجمل تقدرين تسحبينها من الجوانب  بشويش عشان تكون عريضة ..

*

*

*

إن شاء الله أكون وضحت طريقة الضفيرة ببساطة ..

لا تنسون الاشتراك في المدونة 🙂

مناكير مستوحى من عطر DAISY MARC JACOBS

Hello my fashionistas 🙂

جبت لكم اليوم خطوات لمناكير مستوحى من زهرة الأقحوان المعروف فيها عطر DAISY by Marc Jacobs ..

التصميم ربيعي صيفي ومتأكدة بيعجب بنات كثير ..

***

الأدوات

– مناكير قليتر باللون الذهبي ..

– مناكير ذهبي ..

– مناكير أبيض ..

– مناكير زهري فاتح (اللي تنحط في الفرينش french) ..

– فصوص (اختياري) ..

– أداة تنقيط المناكير (إذا ما عندك استخدمي عود الأسنان) ..

***

الـبـدايـة

لحماية الأظافر حطي طبقة مناكير شفافة واتركيها تجف ..

***

الإبـهـام و الـوسـطـى

– نحط طبقة من المناكير الزهرية ونتركها تجف تماماً ..

– باستخدام أداة التنقيط (أو عود أسنان) نسوي خمس نقاط على شكل زهرة ونكررها على حسب حجم الظفر، نحط نقاط صغيرة في الفراغات ..

– بعد ما تجف تماماً نحط نقطة من المناكير الشفافة على وسط كل زهرة ..

– ثم مباشرة نلصق عليها الفص ..

***

 الـسـبـابـة و الـخـنـصـر

– نحط طبقتين م المناكير الزهري ونتركها تجف تماماً ..

– بالمناكير الشفاف نحط نقطة على قاعدة الظفر ونلصق الفص (إذا ما عندك تقدرين تحطين نقطة من المناكير الذهبي) ..

***

الـبـنـصـر

– نحط طبقة مناكير ذهبية ونتركها تجف تماماً ..

– نحط طبقة مناكير القليتر الذهبي (دائماً يُفضل قبل مناكير القليتر تحطين مناكير بنفس اللون عشان يخلي مناكير القليتر تكون قوية وواضحة) ..

***

بعد جفاف كل الأظافر حطي طبقة مناكير شفافة عشان تعطي لمعة حلوة للمناكير ..

و هــــذا الــشــكــل الــنــهــائــي لـلــمــنــاكــيــر

*

*

*

أتـمـنـى تـعـطـونـي آرائـكـم بـعـد مـا تـجـربـونـه ..

ولا تسون تشتركون بمدونة Bella Novela ليصلكم كل جديد ..

مكياج على طريقة Rihanna

مـــرحـــــبــــا

النجمة Rihanna معروفة بستايلاتها الجريئة والمجنونة، وحالياً هي من أبرز رموز الموضة العصرية، فخلال سنتين صممت مجموعة أزياء مع ماركة ريفر أيلاند، وتعاونت مع ماك لإطلاق مجموعتين من مستحضرات التجميل اللي تحمل توقيعها، بالنسبة لي يعجبني أسلوب مكياجها فقط (أما أزياءها فلا تستهويني) ..

إليكِ عزيزتي هذا اللوك الأخير الذي ظهرت به في حفل CFDA للأزياء ..

طبعاً الميك أب كان سموكي بلمسة فضية، رائع للسهرات وبما أننا في الصيف نقدر نقول للعرائس بعد 🙂

أهم شيء بهذا اللوك وكل لوك سموكي هو الدمج ثم الدمج ثم الـــدمــــج ..

Enjoooy

***

البداية بتكون بوجه نظيف ومترطب، رح نترك الفاونديشن لبعد مكياج العيون عشان نقدر ننظف الشادو المتساقط بسهولة، لكن إذا كنتي حابة تبدئين بكريم الأساس فهذا راجع لك، على العموم اضغطي هــــنـــا للتفاصيل ..

لمشاهدة الدليل الشامل لفرش المكياج تفضلي هـــــنـــــا ..

***

((اضغطي على الصور لتكبيرها))

• أولاً نحط برايمر العيون عشان تثبت الألوان ويبان لونها ..
• بفرشة دمج نحط شادو مشمشي فاتح على عظمة الجفن (نوزعها بالتساوي على كامل المنطقة) ..
• بفرشة دمج أخرى نحط شادو بني فاتح على نفس المكان لكن بتحديد أكثر (اللونين مع بعض بيعطون تدرج حلو للسموكي) ..
• بفرشة مسطحة نحط شادو رمادي لامع على كامل الجفن المتحرك ..
• نرجع للشدو البني الفاتح وندمج حدود الرمادي تحت عظمة الجفن عشان ما يكون اللون حاد (حاولي كل خطوة تسوينها ترجعين للشدو البني وفرشة الدمج وتدمجين، عشان ما تضطرين تعدلين بعدين) ..

***

• بفرشة دمج نحط شادو رمادي مطفي و ندمجه بحركة دائرية على الزاوية الخارجية للعين ..
• بفرشة مدببة نحط شدو أسود مطفي على الزاوية الخارجية على شكل < عشان تعطي عمق لنظرة العين ..
• حطي على الجفن مثبت مكياج وخذي شدو قليتر مضغوط باللون الفضي الغامق وحطيه سواء بإصبعك أو بالفرشة على الجفن المتحرك ..

***

• نركب الــرمـوش الـصـنـاعـيـة ..
• ننظف تحت العين جيداً (إذا كنتي مؤجلة الفاونديشن حطيه اللحين)، بعدين نحط الكونسيلر ونثبت بالبودرة ..
• نرسم الـحـواجـب ونرتبها ..
• ناخذ شدو فاتح ونحطه كإضاءة تحت الحاجب ..
• كلمسة نهائية على مكياج فوق العين ناخذ فرشة دمج نظيفة وندمج على خفيف (كسرة العين فقط وليس الجفن المتحرك) ..

***

• بفرشة دمج صغيرة نخلط الشدو المشمشي مع البني الفاتح ونحطه أسفل العين ..
• بفرشة مسطحة ناخذ من الشدو الرمادي المطفي ونحطه على منابت الرموش السفلية للعين ..
• بفرشة مسطحة أخرى نحط الشدو الرمادي اللامع ونحطه على بداية الرموش (صورة 2) ..
• بالفرشة  المسطحة الأولى نحط من الشدو الأسود على نهاية الرموش (صورة 3) ..
• نرجع لفرشة الدمج الصغيرة وندمج على خفيف ..
• بفرشة صغيرة ناخذ شدو أبيض ونحطه على مدمع العين ..
• نرسم داخل العين بقلم الكحل الأسود، ونحط مسكرا على الرموش السفلية ..
• خلصنا مكياج العين 🙂 ..
• نكمل باقي المكياج من برونز وبلش وروج زهري فاتح ..

***

و هـــذا هــو الـلـــوك الــجــمــيــل :

*

*

أتمنى يكون الموضوع عجبكم , لا تنسون تعطوني رايكم 🙂

الخطوات الأساسية لأي مـكـيـاج

بـسـم الله الـرحـمـن الـرحـيـم

كثير بنات يسألون عن الخطوات الصحيحة لأساسيات المكياج ويبغون الشرح الوافي لهذا الموضوع وبالترتيب (خاصةً المبتدئات بالمكياج) ..

إليك عزيزتي هذا الموضوع الشامل عن كل شيء يخص الفاونديشن والكونسيلر و كيف تخلين بشرتك صافية ومثالية بالمكياج ..

أنا رح أفصل الخطوات كاملة ومو ضروري تسوينها كلها (على حسب رغبتك) ..

***

تـقـشـيـر الـبـشـرة و الـشـفـاة

طبعاً تحت كل طبقة قشور تكمن البشرة الجميلة الملساء، لذلك يُنصح تقشير البشرة قبل المكياج (التقشير اليومي البسيط) والسبب هو أن قشور البشرة بتكون واضحة مع الفاونديشن ( أكلمك يا صاحبة البشرة الجافة 🙂 ) ..

اختاري المقشر المناسب لبشرتك، أنا شخصياً بشرتي جداً جافة عشان كذا يناسبني غسول فيتامين E مع الفرشة الصغيرة أو الليفة الصغيرة (كلهم من البودي شوب ولا تخافين الفرشة والليفة ناعمة وما تألم أبداً ههههههه)، ابتعدي عن منطقة العيون ..

تـذكـري:   بـشـرة جـمـيـلـة = مـكـيـاج جـميـل

و مـا نـنـسـى الـشـفـاة

فيه أنواع كثيييير لتقشير الشفاة لكن أسهل شيء هي أنك إذا خلصتي من أسنانك كملي على شفايفك بالفرشة هههههههههههه ) طبعاً بعد ما تغسلين المعجون من الفرشة عشان ما تسود بالشفايف) ..

بعدين حطي فازلين عشان بعد ما تخلصين من كل شيء تكون شفايفك مترطبة ومستعدة للــرووووج 🙂

***

الـتـرطـيـب ثم الـبـرايـمـر

بعد تنظيف ضروري جداً استخدام الكريم المرطب للبشرة والعيون عشان ما ترجع تتكون القشور (كل أنواع البشرة من دون استثناء) ..

نصيحة:  إذا حطيتي كريم العيون اتركيه حتى يتشرب في البشرة وكرري العملية كذا مرة، هذي الطريقة بتخلي منطقة العيون مترطبة جيداً وبالتالي الكونسيلر ماراح يدخل في التجاعيد ..

بعد ما تتشرب البشرة المرطب نحط البرايمر ( تكلمت عنه هــــنـــــا )

***

الــكــوريــكــتـر (مـصحـح الـلـون)

هذي الخطوة اختيارية، وهي للي عندهم عدم توحد شديد للبشرة زي البشرة السمراء أو للي عندهم هالات سوداء غامقة و ممكن تقلب  رمادي في المكياج ..

الكوريكتر هو الإعتماد على ألوان معينة لإلغاء ألوان غير مرغوبة في البشرة زي اللون البرتقالي أو السلموني لإلغاء السمار الشديد في البشرة (مثل عدم التوحد الشديد حول الفم أو الهالات السوداء)، أو اللون الأخضر لإلغاء الإحمرار الشديد (زي إذا عندك حبوب) ..

والطريقة إنك تحطين على الأماكن المرغوب توحيدها فقط وليس كامل الوجه، استخدام الكوريكتر يعتمد على مدى احتياجك له ..

( إذا ما كنتي تحتاجين هالخطوة انتقلي للخطوة الثانية مباشرة )

***

كــريــم الأســــاس

هو الأساس اللي يتوزع على كامل الوجه والرقبة وله أنواع ..

تتنوع التغطيات من خفيفة إلى متوسطة إلى عالية وكلها على حسب رغبة كل امرأة ..

فيه ناس يحبون يحطونه بعد ميك أب العيون وفيه ناس (مثلي) يحبون يحطونه قبل، اعتمدي الترتيب اللي يناسبك ..

توجد أساليب مختلفة لتوزيع الفاونديشن:

أصابع اليد – فرشة – اسفنجة (لازم تبلليها وتعصرينها قبل استخدامها عشان ماتتشرب الفاونديشن) ..

لمشاهدة الدليل الشامل لفرش المكياج تفضلي هـــــنـــــا ..

بغض النظر عن الأسلوب المتبع لتوزيع كريم الأساس، ضروري تدمجينه مع البشرة عشان يتوزع بالتساوي ويبان شكله مرتب (لا تنسين الرقبة) ..

***

الــكــونــســيــلــر

وهو مصحح العيوب، ومثل كريم الأساس تتنوع تغطيته على حسب احتياجات كل وحده ..

و برضو مثل الفاونديشن فيه ناس يحبون يحطونه قبل مكياج العيون وفيه ناس (مثلي) يحبون يحطونه بعد ..

أنصحك تحطينه بعد مكياج العيون لأن فيه احتمال أن الشادو يتناثر تحت العين و بيكون أسهل لك التنظيف إذا خليتيه بعد مكياج العيون ..

أفضل طريقة لتوزيع الكونسيلر هي الطبطبة بالأصبع (البنصر) وهذا لأن حرارة الجسم بتخلي الكونسيلر يندمج بشكل جميل ..

***

الــكــونــتــور (نحت الوجه)

إذا كنتي حابة تسوين هالخطوة تفضلي اقرئي موضوعي الكامل عن الكونتور هـــــنــــا ..

(إذا ما تبغين تسوين كونتور استمري للخطوة الجاية)

***

التـثـبـيـت بـالـبـودرة

طبعاً التثبيت بالبودرة بيكون من اللمسات الأخيرة للمكياج، يعني لنفرض أنك خلصتي العيون بيكون هذا الوقت المناسب للتثبيت ..

للبودرة أنواع: المضغوطة (كومباكت) و السائبة (لوس)، بالنسبة لي أحس ما فيه فرق بينهم, كلهم بيعطونك نفس النتيجة، لكن الإختلاف هو بنوعية البودرة (هل هي العادية، المعدنية أو الخاصة بالبشرة الدهنية) ..

معلومة:  انتشرت مؤخراً بودرة الـHD وهي رائعة لتصوير الفيديو لكن انتبهي انتبهي انتبهي تحطينه إذا ناوية تتصورين تصوير فوتوغرافي لأن بيظهر لون أبيض على وجهك (ما يبان بالعين المجردة لكن في الصور الفلاش بيخليه زي الطحين على وجهك) ..

***

A- الــبــرونــز

خطوة اختيارية لكنها حلوة وبتعطيك لوك صحي وسنحه برونزية جميلة ..

B- الــبــلــش (أحمر الخدود)

ضروري جداً لأن كريم الأساس بياخذ من لون خدودك وبيخلي وجهك لون واحد عشان كذا البلشر بيعطيك لون لوجنتيك 🙂

C- الـهـايـلايـت (الإضاءة)

صار من ضروريات المكياج لأنه يعطي البشرة لوك صحي ونضر ..

اضغطي على الصورة التالية للتعرف أكثر على البرونز-بلش-الهايلايت ..

***

و بــكـذا نـكـون انـتـهـيـنـا مـن أسـاسـيـات كـل مـكـيـاج ..

🙂