السر إلى شعر طويل وصحي

مرحبا 🙂

من المعروف أن سر الشعر الجميل والصحي هو فروة الرأس الصحية ..

عشان كذا جبت لكم نظام للعناية فيه خلطة زيوت طبيعية ومتوفرة في كل مكان ..

فيه بنات يحبون هالسوالف ويستمتعون وهم يخلطون ويلطخون بهالخلطات، بس أنا من نوع الأشخاص العجلين اللي لازم أشوف النتيجة بسرعة عشان يصير عندي دافع أكمل واستمر ..

إذا كنتي مثلي وتستصعبين حكاية حمام الزيت عشان الروائح المزعجة فعندي لك الحل، نظام العناية اللي بعلمك عليه روائحه خفيفة وبتحسين بالفرق من أول أسبوع ..

***

الزيوت المستخدمة وفوائدها:

• زيت جوز الهند:  يعمل العجائب لفروة الرأس الجافة والدهنية على حد سواء، ويساعد الشعر المتضرر على استعادة بريقه وحيويته، والحفاظ عليه من الداخل والخارج, بالنسبة للريحة فهو يذكرني بريحة البسكويت 🙂 .. (قريباَ بسوي موضوع شامل ومفصل عن استخداماته الكثيرة).

• زيت اللوز:  مصدر غني بفيتامين E, فيتامين D, مغنيسيوم, و نسبة من المعادن والدهون المفيدة في نواح كثيرة.
• زيت الزيتون:  يساعد على نمو الشعر وذلك لاحتوائه على فيتامينات D ,E ,B, يحتوي أيضا على الدهون الأحادية الغير مشبعة التي تعمل على تقوية جذور الشعر ومنع تساقطه وتزيد من بريق الشعر ولمعانه.
• زيت الصبار:  يحتوي على نسبة عالية من الأحماض الدهنية، وهو مهم في الحد والوقاية من فقدان وتساقط الشعر، ويعمل كحماية للبصيلات.

• زيت الأركان:  يساعد على زيادة نمو الشعر بشكل صحي وقوي ويعالج ويجدد الشعر التالف، وهو منعم طبيعي للشعر المجعد وذلك لإحتوائه على بعض الفيتامينات وخاصة فيتامين E و فيتامين A.

***

الطريقة:

نجيب زبدية ونخلط فيها الزيوت, نصب كميات متساوية على حسب طول شعرك ..

نسخنها بالمايكرويف عشان تصير دافئة، تقريباَ 25 ثانية تكفي، تأكدي أنها ما تكون حارة ولكن دافئة، والسبب هو أنها تسمح لفروة الراس بتشربها بشكل أفضل, بعد ما صارت دافئة نوزعها على الجذور أولاَ ..

طريقة التوزيع الصحيحة هي أنك تغمسين أصابعك بالزيت بعدين تسوين مساج للفروة عشان تتحرك الدورة الدموية، كل ما تنتقلين لقسم من الشعر ارجعي غمسي أصابعك بالزيت لحد ما تغطين كل الجذور ..

بعدين ننتقل للأطراف.. برضو غمسي أصابعك ومشطي شعرك بيدك عشان تغطين كل شعره ..

ترا مو شرط تستخدمين كل الزيت وتخلينه لحد ينقط من شعرك، كمية بسيطة تكفي تغذي لك الشعر كله ..

***

ظفري شعرك وارفعيه على شكل كعكة ..

***

بعدين عشان ندفئ الفروة زيادة ناخذ سيشوار وبحرارة متوسطة نمشي على الراس كله ..

في حال كنتي تبين تنامين فيه تأكدي أنك تلفين راسك بسكارف أو منشفة عشان ما تبقع مخدتك ..

بس إذا جالسة بالبيت وما عندك شيء غطي شعرك وخليه بالمدة اللي تريحك بس ما تقل عن ساعتين، الزيوت طبيعية وما منها ضرر إذا طولت على راسك ..

***

بالنسبة للشامبو تقدرين تختارين النوع اللي تحبينه، شخصياَ نوع شعري عادي إلى جاف بس عندي شامبو للشعر الدهني استخدمه إذا سويت حمام زيت لشعري عشان ينظف بسرعة ..

خذي شور عادي بس ضروري دايماَ بعد الشامبو تحطين بلسم على أطراف شعرك، حتى بالأيام العادية ..

***

خلال الأسبوع إذا ما عندك وقت تسوين حمام الزيت تقدرين تستخدمين الماسكات بعد الشامبو والبلسم ..

الأنواع الحلوة للماسكات:

• ماسك الثوم.

• ماسك الثوم – الصبار – جوز الهند.

• ماسك بيض – عسل – خروع – نخاع.

***

بالنسبة لاستخدام الماسك هو أنك بالشور غسلي بالشامبو وحطي البلسم دقيقتين وإذا غسلتيه جففي شعرك بالمنشفة شوي بعدين حطي الماسك على كامل الشعر مع حركات المساج للفروة، اتركيه على شعرك وكملي شور، بعد 10 دقائق شطفي بموية باردة ..

***

سوي هذا النظام مرة في الأسبوع عالأقل أو على حسب قدرتك ..

على طول بتحسين شعرك مترطب وفيه لمعه صحية حلوة, وبعد كم اسبوع بتشوفين الفرق من جد!! بتلاحظين نمو شعر جديد وبتلقين شعرك يطول أسرع من المعتاد ..

أتمنى تجربون هالنظام وتعطوني رايكم فيه ..

ولا تنسون تشتركون في المدونة 🙂